Paper Details

Dalit aatmakatha sahitya bas sahitya nahin balki samaaj ki kuprathaon ka aaina dikhaane wala sashakt maadhyam hai. Daliton ka sangharshamay jeevan, unki samasyaon ko, utpeedan, shoshan ko samaaj ke saamne laane ka kaam Dalit aatmakathaayen karti hain. Yeh bas aatmakathaayen nahin, samaaj ki vishamataon ko ujagar karne wale dastaavez hain; jo Dalit samaaj ko nyaay dilaane ke liye cheekhte hain. Nyaay ki, samaanta ki, apeksha karte hain. Dalit samaaj ke vyaktiyon ki bhaavanaen, unki aakankshaon ko kaise kuchla jaata hai, unke jeevan se kaise khilvaad kiya jaata hai iska jeevant udaaharan deti hain. Yeh ek aisi kraantikaari dhaara hai, jismein samaaj ke nichle tabke mein dabaaye gaye, kuchle gaye samaaj ko mukti ka svar diya. Yeh ek saamuhik ladai hai, jo is samaaj mein vyaapt kuprathaon se mukti ka aavahan karti hai. Omprakash Valmiki ki ‘Joothan’, Mohandas Naimishray ki ‘Apne-Apne Pinjre Mein’, Kaushalya Baisantri ki ‘Dohra Abhishaap’, Tulsiraam ki ‘Murdahiya’—aisi ek nahin kitni saari aatmakathaayen hain, jismein lekhak apni aapbeeti ke sahaare Dalit samaaj ke prati anyaay ka, atyachaar ka virodh karte hain. Jis samaaj ne sadiyon se maun rakha, jo ho raha tha use chupchaap sahan kar liya, us samaaj mein 20vi sadi mein ek kraanti ki jyot jagi. Apne upar ho rahe anyaay ko samaaj ke saamne laane ka ek sashakt maadhyam unhein mila. Hindi sahitya mein Dalit sahitya ka uday hua, jismein is samaaj ke upar prathaon ke naam par jo anyaay-poorak reeti-rivaazon ko laad diya gaya tha, uske khilaaf awaaz uthaane ki jung chhed di gayi. Yeh jung saahityaatmak thi jiske antargat apni lekhani ke maadhyam se samaaj mein jan-jaagruti karne ka prayaas kiya gaya.

Dalit, Asprishya, Samaajik, Chetanaa, Aatmakatha